VII FESTA DOS MAIORES

Axudados por unha temperatura moi agradable e lucindo o sol durante todo o día celebrouse no Concello de Paderne o pasado 26 de abril, a súa VII Festa dos Maiores que congregou a 450 persoas no pavillón polideportivo municipal.

A media mañá o recinto, engalanado para a ocasión, comezou a recibir ós primeiros invitados que, en previsión de conseguir un bo sitio para asistir ó oficio relixioso, comezaban a chegar ó lugar.

Os actos desenvolvéronse tal e como tiña previsto a organización que satisfeita, escoitaba con orgullo as palabras de felicitación que as persoas maiores dedicaban ó Alcalde por esta nova edición da súa festa.

Novamente o acto de homenaxe ós maiores de cada parroquia puxo a carga emotiva no ambiente logrando que estas persoas, algunha das cales leva xa moitas edicións participando no mesmo, esperen con especial significado este día.

Ós postres cada un dos maiores homenaxeados recibía de mans do Alcalde unha foto enmarcada como recordo da celebración. Como en cada unha delas figura impresa a data na que se desenvolveu a festa, vana gardando ano tras ano como quen garda un trofeo.

O día rematou cunha animada sesión de baile ata as sete da tarde, hora na que os autobuses volvían a realizar o servicio de transporte polas parroquias.