FEIRA DE PADERNE

A XII edición da Feira de Paderne celebrada os días 2 e 3 de xullo, contou coa presenza do Sr. Ministro de Xustiza D. Francisco Caamaño Domínguez que quixo acompañar ao Alcalde neste importante acontecemento que está a ser un referente para toda a comarca e unha sinal de identidade e do bo traballo que se está a facer en Paderne.

É xa o segundo ano que un ministro se achega ata o noso Concello como premio ao esforzo realizado polo Alcalde e o seu equipo por impulsar a economía da zona. Francisco Caamaño marchou de Paderne deixando un grato recordo entre tódolos expositores e persoas presentes na Feira; logo do discurso inaugural no que xa cautivou polas acertadas palabras, foi interesándose polos productos presentados en cada un dos stands, saudando e sacando fotos con cada persoa que se lle achegaba ata percorrer tódolos lugares da Feira facendo gala sempre de un trato exquisito e gran amabilidade.

Un gran éxito de público, que destacaron tamén tódolos medios de comunicación, volveu a premiar esta labor colectiva en Paderne que conta con atractivos que non deixan indiferentes ás persoas que a visitan.

Dous días nos que os expositores mostraron o mellor dos seus establecementos; o último en canto a tecnoloxía, ofertas específicas para estes días de Feira e, sobre todo unha boa atención ó público.

Ademais das seccións clásicas nas que se ven apoiando o programa desde o primeiro ano, sempre se pode contar con algunhas novidades coas que sorprender aos visitantes como foron a concentración moteira que xuntou unhas 275 motos o domingo á mañá, a exhibición de coches antigos, a tala de figuras con motoserra ou a exhibición de tiro con arco.

Todo o que se presenta en Paderne, xunto coa ilusión e esforzo dos que participan nesta Feira, fai que sexa un dos acontecementos máis importantes e esperados de toda a provincia.

Os sectores máis representativos do tecido empresarial e económico así como os diversos colectivos representados polos talleres que realizan as asociacións de Paderne, teñen un lugar neste acontecemento que ven a demostrar ós visitantes unha parte fundamental do que dentro do Concello se está a realizar.

Comezou a súa andadura no ano 2000 no recinto do campo de O Telleiro, preto da Casa Consistorial.

Durante os dous días que dura pódense visita-los stands que, baixo carpas separadas por sectores comerciais, mostran as novidades e traballos que os diversos expositores exhiben.

Os sectores participantes están agrupados en torno a actividades comerciais; así temos zonas adicadas a comerciais, gando, horta, flor, maquinaria e exposicións diversas.

Cada ano as solicitudes por participar neste evento son superiores á capacidade de que dispón o recinto para acomodar tanta demanda comprobando así a gran expectación que a Feira xenera tanto nos empresarios da comarca como de fóra.

En cada edición o visitante pódese atopar con novos comerciais e empresas que consideran esta Feira como un referente para toda a comarca e que buscan un sitio nela a fin de promove-los productos que representan.

Non podemos esquecer que nun acontecemento destas características o visitante a de poder disfrutar todo o día, non só visitando os diversos stands senón tamén coas actividades que complementan un programa amplo e variado para que tanto nenos como maiores pasen dúas xornadas en Paderne amenas e entretidas para todos.

Así, ademais do xa tradicional concurso de cans que, como ven sendo habitual celébrase o primeiro día pola tarde, os amantes do mundo animal poden disfrutar dunha exhibición ecuestre o domingo.

Os máis pequenos teñen tamén a diversión asegurada con diversas atraccións das que poden disfrutar libremente.

Pódense degusta-lo productos de Paderne; empanadas, doce, queixo, viño, queimada e terneira, productos todos eles representativos do Concello.

As composicións florais que os floricultores de Paderne realizan, poñen sempre a nota de cor dentro do recinto.

Demostraccións, talleres e diversas actuacións, ademais dos propios expositores e unha coidada organización son algúns dos atractivos que fan que esta Feira se consolide ano tras ano como un dos acontecementos da Comarca.